പുതിയ അതിഥിക്കായി മൂത്ത കുട്ടിയെ എങ്ങനെ ഒരുക്കാം?

രണ്ടാമതൊരു കുഞ്ഞ് ജനിക്കാൻ പോകുമ്പോൾ മിക്ക മാതാപിതാക്കളുടെയും ഉള്ളിലുള്ള വലിയൊരു ആശങ്കയാണ് “മൂത്ത കുട്ടി ഇതിനോട് എങ്ങനെ പ്രതികരിക്കും?” എന്നത്. തനിക്ക് കിട്ടിയിരുന്ന സ്നേഹവും ശ്രദ്ധയും കുറയുമോ എന്ന് അവർ ഭയപ്പെടുമോ? പുതിയ അതിഥിയുടെ വരവ് അവർക്ക് മാനസികമായി ബുദ്ധിമുട്ടുണ്ടാക്കുമോ?

ഇത്തരം ചിന്തകൾ സ്വാഭാവികമാണ്. എന്നാൽ കുട്ടികൾ നാം വിചാരിക്കുന്നതിനേക്കാൾ വേഗത്തിൽ മാറ്റങ്ങളോട് പൊരുത്തപ്പെടുന്നവരാണ്. കുട്ടിയുടെ പ്രായമനുസരിച്ച് അവരെ മാനസികമായി തയ്യാറാക്കാൻ താഴെ പറയുന്ന കാര്യങ്ങൾ ശ്രദ്ധിക്കുക.

രണ്ട് വയസ്സിന് താഴെയുള്ള കുട്ടികൾ (Toddlers)

രണ്ട് വയസ്സിന് താഴെയുള്ള കുട്ടികൾക്ക് “അനിയൻ” അല്ലെങ്കിൽ “അനിയത്തി” എന്നതിനെക്കുറിച്ച് വ്യക്തമായ ധാരണയുണ്ടാകില്ല. അതുകൊണ്ട് ഗർഭത്തിന്റെ ആദ്യ മാസങ്ങളിൽ തന്നെ ഇതിനെക്കുറിച്ച് പറഞ്ഞു തുടങ്ങേണ്ടതില്ല. ഇത് അവർക്ക് ആശയക്കുഴപ്പമുണ്ടാക്കാം.

• എപ്പോൾ പറയണം: പ്രസവത്തിന് ഒന്ന് രണ്ട് മാസങ്ങൾക്ക് മുൻപ് പറഞ്ഞു തുടങ്ങുന്നതാണ് ഉചിതം.
• എങ്ങനെ പറയണം: വളരെ ലളിതമായി പറയുക. “അമ്മയുടെ വയറ്റിൽ ഒരു വാവയുണ്ട്. കുറച്ചു കഴിയുമ്പോൾ വാവ നമ്മുടെ കൂടെ താമസിക്കാൻ വരും.” കുഞ്ഞുങ്ങളുടെ ചിത്രങ്ങൾ കാണിച്ചു കൊടുക്കാം.
• പ്രധാനം: കുട്ടിയുടെ പതിവ് ദിനചര്യകളിൽ (ഭക്ഷണം, ഉറക്കം, കളി) മാറ്റം വരുത്താതിരിക്കാൻ ശ്രദ്ധിക്കുക. എന്തെങ്കിലും മാറ്റം വരുത്തണമെന്നുണ്ടെങ്കിൽ (ഉദാഹരണത്തിന് കുട്ടിയെ മറ്റൊരു മുറിയിലേക്ക് മാറ്റുകയോ മറ്റോ) അത് പ്രസവത്തിന് മാസങ്ങൾക്ക് മുൻപ് തന്നെ ചെയ്യുക.

2 മുതൽ 4 വയസ്സുവരെയുള്ള കുട്ടികൾ (Preschoolers)

ഈ പ്രായത്തിലുള്ള കുട്ടികൾക്ക് വാവ വരുന്നു എന്ന കാര്യം മനസ്സിലാകും. എന്നാൽ അതോടൊപ്പം തന്നെ “അമ്മയ്ക്ക് എന്നെക്കാൾ ഇഷ്ടം വാവയെ ആകുമോ?” എന്ന പേടിയും അവർക്കുണ്ടായേക്കാം.

• സംസാരിക്കേണ്ട രീതി: വയർ വലുതായി തുടങ്ങുമ്പോൾ തന്നെ അവരോട് പറയാം. കഥാപുസ്തകങ്ങളിലൂടെയും മറ്റും പുതിയ അതിഥിയുടെ വരവിനെക്കുറിച്ച് പറഞ്ഞു കൊടുക്കുക. വാവയുടെ സാധനങ്ങൾ വാങ്ങുമ്പോഴും മുറി ഒരുക്കുമ്പോഴും അവരെ കൂടെ കൂട്ടുക.
• പേടി മാറ്റുക: “വാവ വരുമ്പോൾ അമ്മയ്ക്ക് വാവയെ ഒരുപാട് ശ്രദ്ധിക്കേണ്ടി വരും. ആ സമയത്ത് നിനക്ക് സങ്കടം തോന്നിയേക്കാം. അങ്ങനെ തോന്നുമ്പോൾ അമ്മയോട് പറയണം, നമുക്ക് അല്പനേരം ഒരുമിച്ചിരിക്കാം” എന്ന് മുൻകൂട്ടി പറയാം.
• യാഥാർത്ഥ്യം പറയുക: കുഞ്ഞ് വന്നാലുടനെ നിന്റെ കൂടെ കളിക്കാൻ കിട്ടില്ലെന്നും, കുഞ്ഞ് എപ്പോഴും ഉറങ്ങുകയോ കരയുകയോ ചെയ്യുമെന്നും അവരോട് പറയണം. വലിയൊരു കളിക്കൂട്ടുകാരനെ പ്രതീക്ഷിച്ച് ഇരിക്കുന്ന കുട്ടിക്ക് ഒരു കൊച്ചു വാവയെ കാണുമ്പോൾ നിരാശ തോന്നാതിരിക്കാൻ ഇത് സഹായിക്കും.

5 മുതൽ 7 വയസ്സുവരെയുള്ള കുട്ടികൾ

ഈ പ്രായത്തിലുള്ള കുട്ടികൾക്ക് കാര്യങ്ങൾ കൂടുതൽ വ്യക്തമായി മനസ്സിലാക്കാൻ കഴിയും. അവർക്ക് ഒരുപാട് ചോദ്യങ്ങളുണ്ടാകും.

• വിശദമായി പറയുക: കുഞ്ഞ് എങ്ങനെയാണ് ഉണ്ടായതെന്നും, പ്രസവത്തിനായി അമ്മ ആശുപത്രിയിൽ പോകുമ്പോൾ അവർ ആരുടെ കൂടെയായിരിക്കും എന്നതിനെക്കുറിച്ചും വ്യക്തമായി പറയുക.
• പങ്കാളികളാക്കുക: കുഞ്ഞിന് പേര് തിരഞ്ഞെടുക്കുന്നതിലും മറ്റും അവരുടെ അഭിപ്രായം കൂടി ചോദിക്കുക. ഇത് തങ്ങളും ഈ കുടുംബത്തിലെ പ്രധാനപ്പെട്ട അംഗമാണെന്ന തോന്നൽ അവർക്കുണ്ടാക്കും.
• ബുദ്ധിമുട്ടുകൾ മറച്ചു വെക്കണ്ട: “വാവ വരുമ്പോൾ ഉറക്കം കുറയുമെന്നും അല്പം ബുദ്ധിമുട്ടുകൾ ഉണ്ടാകുമെന്നും” അവരോട് പറയുക. എങ്കിൽ മാത്രമേ സാഹചര്യം മോശമാകുമ്പോൾ അവർക്ക് അത് ഉൾക്കൊള്ളാൻ കഴിയൂ.

8 വയസ്സിന് മുകളിലുള്ള കുട്ടികൾ

മുതിർന്ന കുട്ടികൾക്ക് അമ്മയുടെ അവസ്ഥ മനസ്സിലാക്കാനും സഹായിക്കാനും കഴിയും.

• ബഹുമാനത്തോടെ സംസാരിക്കുക: അവരോട് കാര്യങ്ങൾ തുറന്നു പറയുക. പ്രസവശേഷം ഉണ്ടാകാൻ പോകുന്ന മാറ്റങ്ങളെക്കുറിച്ച് വ്യക്തമായ ധാരണ നൽകുക.
• അഭിപ്രായം ചോദിക്കുക: അവർക്ക് പുതിയ അതിഥിയെക്കുറിച്ച് എന്ത് തോന്നുന്നു എന്ന് ചോദിച്ചറിയുക. ചിലപ്പോൾ അവർക്ക് അല്പം വിമുഖത ഉണ്ടായേക്കാം. അത് സ്വാഭാവികമാണെന്ന് അവരെ ബോധ്യപ്പെടുത്തുക.
• ചെറിയ ഉത്തരവാദിത്തങ്ങൾ നൽകുക: വാവയെ നോക്കുന്നതിലോ കളിപ്പിക്കുന്നതിലോ അവരെ കൂടി ഉൾപ്പെടുത്തുക. ഇത് സഹോദരങ്ങൾ തമ്മിലുള്ള ബന്ധം ദൃഢമാക്കാൻ സഹായിക്കും.

പ്രസവശേഷം ശ്രദ്ധിക്കാൻ

• മൂത്ത കുട്ടി വാവയെ ആദ്യമായി കാണുമ്പോൾ വാവയുടെ വകയായി ഒരു ചെറിയ സമ്മാനം നൽകുന്നത് നല്ലതാണ്.
• കുഞ്ഞിനെ നോക്കുന്ന തിരക്കിനിടയിലും മൂത്ത കുട്ടിക്കായി കുറച്ചു സമയം പ്രത്യേകം മാറ്റിവെക്കുക.
• അവരെ അവഗണിക്കുന്നു എന്ന തോന്നൽ ഒരിടത്തും ഉണ്ടാക്കരുത്.

കുട്ടികൾ പുതിയ മാറ്റങ്ങളോട് പെട്ടെന്ന് പൊരുത്തപ്പെടും. നിങ്ങളുടെ സ്നേഹവും കരുതലും അവർക്ക് വേണ്ടുവോളം നൽകുക.

---

ഈ ലേഖനം പൊതുവായ അറിവിനായി മാത്രമുള്ളതാണ്. ഓരോ കുട്ടിയും വ്യത്യസ്തമാണ്. നിങ്ങളുടെ കുട്ടിയുടെ സ്വഭാവമറിഞ്ഞ് അവരെ കൈകാര്യം ചെയ്യുക.